Bennad

Ut bestuur 5 of 6 (ik bun de tel kwiet) Onze vereneging is ut prototiep van un saaje clup veur olde keals. Tís maor goed da’w nog un bestuur hemmen anders hak noojt meer wat te schrieven gehat. Un paar joar geleien hek owleu al gewaarschouwd dat de Deutekomse maffia een koep het gepleegd en alle olde bestuursleden die niet uut deutekum kwammen der wel is raps uut zol werken. Dat ha’j eiges ook wel können bedenken want die statsen mo’j altiet donders in de gaten hollen. Maor ut is nog vol gekker geworren. Ut was mien al langer opgevallen dat atter weer is un vegadering was gewes van die hogen der altiet wel ene was den de kop kapot hat. Daor wo’j eigenluk noojt zo richtig naor vraogen maor kots kwam ik een van de vrouwluu van die keals tegen en toen ze uitgeliepen was klagen ze mien de oren van ut heufd. T’ís mien un spul zeit ze. Tellekes at die keals gewes bun um te vegaderen mok ter weer un paar köpkes bi’jkopen. Ze smiet mekaar met alles naor de kop wat ze maor griepen könt. Ut geet manges haos op houwen op af. Uutendeluk zaggen die keals eiges ok wel in dat ut zo niet wieter kon gaon en hemmen un miedieeter gevraogd hoe ze der met an mossen. Den het un wies besluut genommen en verordeneert datter ene van de boeren terug mos kommen en zo wier nao nog wat kapotte köpkes en schötteltjes daortoe beslaoten. Den is pas geleien geinstalleert en now maor haopen datter weer rus kup in de tent. Ik mot ut nog zien. Hoe of ut wieter geet zak ow de vollegende keer vetellen. Bennad van den stikken drei´j